नागढुङ्गामा जुवाखालमा प्रहरीको छापा, ११ जना पक्राउ

काठमाडौं, जेठ २३ – काठमाडौंको चन्द्रागिरी नगरपालिका–२ नागढुङ्गामा सञ्चालन भइरहेको जुवाखालमा प्रहरीले छापा मारेर ११ जनालाई पक्राउ गरेको छ।

प्रहरीका अनुसार स्थानीय ४१ वर्षीय हरि भुर्तेलको घरमा जुवातास खेलिरहेको सूचनाका आधारमा शुक्रबार राति प्रहरी वृत्त थानकोटबाट खटिएको टोलीले छापा मारेको थियो। छापामार कारबाहीका क्रममा हरि भुर्तेलसहित ११ जनालाई नियन्त्रणमा लिइएको हो।

प्रहरीले घटनास्थलबाट नगद १ लाख ३५ हजार ६ सय ७५ रुपैयाँ तथा ४ बुक तास बरामद गरेको जनाएको छ।

स्थानीय क्षेत्रमा अवैध जुवातास गतिविधिविरुद्ध प्रहरीले निगरानी बढाएको बताउँदै यस्ता गैरकानुनी क्रियाकलापमा संलग्न हुने जो–कोहीमाथि कानुनअनुसार कारबाही गरिने जनाएको छ।

पक्राउ परेकामाथि थप अनुसन्धान भइरहेको प्रहरीले जानकारी दिएको छ।

(स्रोत: नेपाल प्रहरी)