कञ्चनपुरमा ५४ वर्षीया महिलालाई जबरजस्ती करणी गरेको अभियोगमा ६० वर्षीय वृद्ध पक्राउ

कञ्चनपुर, जेठ | कञ्चनपुरको बेलौरी नगरपालिकामा एक महिलालाई जबरजस्ती करणी गरेको अभियोगमा प्रहरीले ६० वर्षीय वृद्धलाई पक्राउ गरेको छ। ५४ वर्षीया महिलामाथि जबरजस्ती करणी गरेको आरोपमा बेलौरी नगरपालिका-४ बुटाबारी बस्ने ६० वर्षीय देव सिंह बोहरालाई शनिबार साँझ प्रहरीले नियन्त्रणमा लिएको हो।

प्रहरीका अनुसार बोहराले ती महिलालाई जबरजस्ती करणी गरेको भन्दै पीडित पक्षबाट प्रहरीमा उजुरी परेको थियो। उजुरी प्राप्त हुनासाथ तत्कालै इलाका प्रहरी कार्यालय बेलौरीबाट खटिएको विशेष प्रहरी टोलीले आरोपित बोहरालाई उनकै गाउँ बुटाबारीबाट पक्राउ गरेको हो।

पक्राउ परेका बोहरालाई हाल इलाका प्रहरी कार्यालय बेलौरीको हिरासतमा राखिएको छ। प्रहरीले पीडित महिलाको स्वास्थ्य परीक्षणसहितका आवश्यक कानुनी प्रक्रियाहरू अगाडि बढाएको छ। घटनाको गम्भीरतालाई ध्यानमा राख्दै जबरजस्ती करणी सम्बन्धी कसुर अन्तर्गत मुद्दा दर्ता गरी थप अनुसन्धान भइरहेको प्रहरीले जनाएको छ।