कञ्चनपुरमा माटोको ढिस्कोले पुरिँदा एक महिलाको दुःखद मृत्यु

कञ्चनपुर, कञ्चनपुरमा माटोको ढिस्कोले पुरिँदा एक महिलाको ज्यान गएको छ। सुक्लाफाँटा नगरपालिका–१२ तिल्की बस्ने ४० वर्षीया हरदुलिया रानाको सोमबार बिहान मृत्यु भएको प्रहरीले जनाएको छ। घटना लालझाडी गाउँपालिका–४ जाइ क्षेत्रमा माटो खन्ने क्रममा भएको हो।

माटो खन्ने क्रममा अचानक ढिस्को खस्दा हरदुलिया माटोमा पुरिएकी थिइन्। घटनाबारे जानकारी प्राप्त हुनासाथ इलाका प्रहरी कार्यालय बेलौरीबाट प्रहरी टोली घटनास्थल पुगेको थियो। स्थानीयवासीको सहयोगमा गरिएको उद्धारका क्रममा उनको शव फेला परेको प्रहरीले जनाएको छ।

उक्त घटनामा माटोको ढिस्कोले पुरिएर अर्की एक महिला घाइते भएकी छन्। घाइतेको धनगढीस्थित संजीवनी अस्पतालमा उपचार भइरहेको छ। घटनाबारे प्रहरीले आवश्यक अनुसन्धान अगाडि बढाएको जनाएको छ।