जगन्नाथदेवल कारागारबाट फरार भएकी जन्मकैद सजाय पाएकी महिला पक्राउ!

काठमाडौंमा सनसनीपूर्ण घटनापछि फरार प्रतिवादी पुनः प्रहरी नियन्त्रणमा परेकी छन्।
अपहरण, शरीर बन्धक, कर्तव्य ज्यान तथा डाँका चोरी जस्ता गम्भीर मुद्दामा जन्मकैद सजाय भुक्तान गरिरहेकी नुवाकोट किस्पाङ गाउँपालिका–१३ की २५ वर्षीया सपना तामाङ कारागारको पर्खाल नाघेर फरार भएकी थिइन्।

गत शुक्रबार राति जगन्नाथदेवलस्थित महिला बन्दी सुधार गृहबाट भागेकी उनलाई प्रहरीले काठमाडौंको असन चोकबाट पक्राउ गरेको हो।

काठमाडौं उपत्यका अपराध अनुसन्धान कार्यालय टेकु, रानीपोखरी प्रहरी कार्यालय तथा नेपाल प्रहरी अनाश्रित गुल्मको संयुक्त टोलीले उनलाई पक्राउ गरेको प्रहरीले जनाएको छ।

फरार भएपछि उनलाई लुकाइछिपाइ सहयोग गर्ने आरोपमा भोजपुर घर भएका ५५ वर्षीय मिन कुमार श्रेष्ठ र २७ वर्षीय समिर उर्फ सुवास श्रेष्ठलाई समेत प्रहरीले पक्राउ गरेको छ।

सपना तामाङलाई पुनः केन्द्रिय कारागार पठाइएको छ भने सहयोग गर्ने दुवै जनामाथि थप अनुसन्धान भइरहेको प्रहरीले जनाएको छ।