विदेश पठाइदिने नाममा ठगी गर्ने दुई जना पक्राउ

काठमाडौं । वैदेशिक रोजगारीका नाममा आकर्षक तलबको प्रलोभन देखाई विभिन्न देश पठाइदिन्छु भन्दै रकम ठगी गरेको अभियोगमा प्रहरीले दुई जनालाई पक्राउ गरेको छ ।

पक्राउ पर्नेमा काठमाडौं महानगरपालिका–३१ बस्ने काभ्रे भुल्लु नगरपालिका–१ घर भएका ५२ वर्षीय मधुसुदन पराजुली र काठमाडौं महानगरपालिका–२८ बस्ने पर्वत कुश्मा नगरपालिका–२ घर भएका ३२ वर्षीय प्रकाश बास्तोला रहेका छन् ।

प्रहरीका अनुसार मधुसुदन पराजुलीले ग्रीस पठाइदिने भन्दै दुई जना पीडितबाट २३ लाख रुपैयाँ ठगी गरेको खुलेको छ । त्यसैगरी प्रकाश बास्तोलाले युएई पठाइदिने भन्दै एक जना पीडितबाट ३ लाख रुपैयाँ लिएर सम्पर्कविहीन भएको उजुरी परेको थियो ।

उजुरीका आधारमा काठमाडौं उपत्यका अपराध अनुसन्धान कार्यालय टेकुबाट खटिएको प्रहरीले मधुसुदनलाई काठमाडौं–१२ बाट र प्रकाशलाई काठमाडौं–२८ बाट पक्राउ गरेको हो ।

उनीहरूलाई थप अनुसन्धान तथा कारबाहीका लागि वैदेशिक रोजगार विभाग ताहाचल पठाइएको प्रहरीले जनाएको छ ।