इन्टरपोल रेड नोटिसपछि वैदेशिक रोजगारी ठगीका फरार अभियुक्त युएईबाट पक्राउ

काठमाडौं । वैदेशिक रोजगारी ठगी मुद्दामा इन्टरपोलबाट रेड नोटिस जारी भएका एक फरार प्रतिवादी युएईबाट पक्राउ परेका छन् ।

पक्राउ पर्नेमा Panchthar मिक्लाजुङ गाउँपालिका–५ घर भएका ३६ वर्षीय सुवास लावती रहेका छन् ।

नेपाल प्रहरीको इन्टरपोल शाखाको अनुरोधमा इन्टरपोल महासचिवालयले २०८२ साउन २६ गते उनीविरुद्ध रेड नोटिस जारी गरेको थियो । त्यसपछि एनसिबि अबुधाबी (युएई) को समन्वयमा उनलाई युएईबाट पक्राउ गरी नेपाल फिर्ता ल्याइएको हो ।

प्रहरीका अनुसार लावतीले वैदेशिक रोजगारीका क्रममा सर्बिया पठाइदिने भन्दै आकर्षक तलबको प्रलोभन देखाई विभिन्न पीडितबाट ११ लाख ६१ हजार रुपैयाँ बैंक खातामा जम्मा गराएर सम्पर्कविहीन भएको आरोप छ ।

उनलाई आवश्यक अनुसन्धान तथा कारबाहीका लागि वैदेशिक रोजगार विभाग ताहाचल, काठमाडौंमा बुझाइएको प्रहरीले जनाएको छ ।