अमेरिका पठाइदिने प्रलोभनमा करोडौं ठगी : मानव बेचबिखन आरोपमा दुई जना पक्राउ

काठमाडौं । वैदेशिक रोजगारीको नाममा अमेरिका र बेलायत पठाइदिने प्रलोभन देखाएर करोडौं रुपैयाँ असुली तथा मानव बेचबिखनमा संलग्न रहेको अभियोगमा प्रहरीले दुई जनालाई पक्राउ गरेको छ ।

पक्राउ पर्नेहरूमा Dang शान्तिनगर गाउँपालिका–३ का २६ वर्षीय लोकमान खत्री र Syangja पुतलीबजार नगरपालिका–४ का ४४ वर्षीय शिव बहादुर थापा रहेका छन् ।

मानव बेचबिखन ब्यूरोबाट खटिएको प्रहरी टोलीले लोकमानलाई जिल्ला प्रहरी कार्यालय सल्यानको समन्वयमा तथा शिव बहादुरलाई पोखराबाट पक्राउ गरेको हो ।

प्रहरीको प्रारम्भिक अनुसन्धानअनुसार लोकमानले पीडितलाई बेलायतको भिजिट भिसालाई वर्किङ भिसामा परिवर्तन गरिदिने र राम्रो कम्पनीमा काम लगाइदिने भन्दै सुरुमा ४ लाख रुपैयाँ लिएका थिए । त्यसपछि अमेरिका पठाइदिने भन्दै पटक–पटक गरी ६५ लाख २६ हजार ७ सय ८० रुपैयाँ असुलेको खुलेको छ ।

पीडितलाई नेपालबाट दुबई, भारत, कतार, स्पेन, ब्राजिल, पेरू, इक्वेडर, कोलम्बिया, पानामा, कोस्टारिका, निकारागुवा, हुण्डोरस र मेक्सिको हुँदै अवैध रूपमा अमेरिका पुर्‍याइएको प्रहरीले जनाएको छ । पछि अमेरिकी प्रहरीले अवैध प्रवेशको आरोपमा पक्राउ गरी १४ महिना जेल राखेपछि डिपोर्ट गरेर नेपाल फर्काएको खुल्न आएको छ ।

त्यसैगरी शिव बहादुर थापाले पनि अमेरिका पठाइदिने आश्वासन दिँदै पीडितलाई दुबई पुर्‍याएर विभिन्न देश हुँदै कोलम्बियासम्म लगेको, त्यहाँ शारीरिक तथा मानसिक यातना दिई बन्धक बनाएको र पटक–पटक गरी १ करोड ४२ लाख रुपैयाँ असुलेको अनुसन्धानमा खुलेको छ ।

प्रहरीका अनुसार थप २० हजार डलर माग गरेपछि रकम दिन नसक्दा पीडितलाई मेक्सिकोमा अलपत्र छाडिएको थियो । पछि अमेरिकास्थित नेपाली राजदूतावासको सहयोगमा पीडित नेपाल फर्किन सफल भएका थिए ।

घटनाले वैदेशिक रोजगारीका नाममा हुने संगठित मानव तस्करीको भयावह रूप फेरि उजागर गरेको छ । प्रहरीले घटनाबारे थप अनुसन्धान भइरहेको जनाएको छ ।