गोरखामा दुई छुट्टाछुट्टै दुर्घटना : बालकसहित दुई जनाको मृत्यु

गोरखामा भएका दुई छुट्टाछुट्टै सडक दुर्घटनामा एक बालकसहित दुई जनाको मृत्यु भएको छ ।

भिमसेन थापा गाउँपालिका–२ रातामाटेस्थित सडकमा गोरखा बजारबाट आरूघाटतर्फ जाँदै गरेको ना. ६ त ६०५९ नम्बरको ट्याक्टर अनियन्त्रित भई दुर्घटना हुँदा ट्याक्टरमा सवार भिमसेन थापा गाउँपालिका–३ माथिल्लो गाउँका १३ वर्षीय बिक्रम बस्याल गम्भीर घाइते भएका थिए ।

मंगलबार बिहान भएको उक्त दुर्घटनापछि उपचारका लागि प्रदेश अस्पताल गोरखा लगिएका उनको बुधबार बिहान उपचारकै क्रममा मृत्यु भएको प्रहरीले जनाएको छ । दुर्घटनामा घाइते भएका ट्याक्टर चालकको सोही अस्पतालमा उपचार भइरहेको छ ।

त्यसैगरी, गोरखा नगरपालिका–१३ तीनकिलोस्थित सडकमा गोरखा बजारबाट आबुखैरेनीतर्फ आउँदै गरेको बा. ९९ प ५५९ नम्बरको मोटरसाइकलले पैदलयात्रीलाई ठक्कर दिँदा अन्दाजी ५० वर्षीय एक पुरुष गम्भीर घाइते भएका थिए ।

घाइते उनको सरकारी अस्पताल भरतपुरमा थप उपचारका क्रममा मंगलबार राति मृत्यु भएको प्रहरीले जनाएको छ । मृतकको नाम, थर र वतन खुल्न बाँकी रहेको छ । घटनापछि मोटरसाइकल चालकलाई प्रहरीले नियन्त्रणमा लिएको छ ।

प्रहरीले दुवै घटनाबारे आवश्यक अनुसन्धान भइरहेको जनाएको छ ।