समस्त देश तथा विदेशमा रहनुहुने आमाबुबा, दिदीबहिनी तथा दाजुभाइहरूमा छठ पर्व २०८३ को हार्दिक शुभकामना!

सूर्य उपासनाको यो महापर्व केवल धार्मिक अनुष्ठान मात्र नभई प्रकृति, मानव जीवन र ऊर्जाको स्रोत सूर्यप्रतिको अगाध श्रद्धा र कृतज्ञताको जीवन्त प्रतीक हो। अस्ताउँदो र उदाउँदो दुवै सूर्यलाई समान रूपले अर्घ्य दिएर मनाइने यस पर्वले जीवनका सुख–दुःख र आरोह–अवरोहलाई समभावका साथ स्वीकार गर्ने गहिरो दर्शन सिकाउँछ। पौराणिक तथा ऐतिहासिक ग्रन्थहरूमा उल्लेख भएअनुसार महाभारतकालमा पाण्डवहरूले गुप्तबासको सफलता र राज्य प्राप्तिका लागि सूर्यदेवको आराधना गरेको तथा त्रेतायुगमा भगवान् श्रीराम र माता सीताले वनवासबाट अयोध्या फर्केपछि कार्तिक शुक्ल षष्ठीका दिन सूर्यपूजा गरेको परम्पराबाट यस पर्वको ऐतिहासिक गरिमा झनै उजागर हुन्छ।

नदी, तलाउ तथा जलाशय किनारलाई अत्यन्तै सफा र पवित्र बनाएर मनाइने छठ पर्वले प्रकृतिप्रेम, स्वच्छता र पर्यावरण संरक्षणको अनुपम सन्देश दिन्छ। कुनै जातजाति, वर्ग वा लिङ्गको भेदभावबिना एउटै घाटमा उभिएर सूर्यदेव र छठी माताको पूजा–आराधना गरिने भएकाले यो पर्व सामाजिक सद्भाव, आपसी एकता र समानताको बलियो सेतु बनेको छ। प्रकृतिका अभिन्न अंग जल र सूर्यको उपासना गर्दै मनाइने यस महान् पर्वले हामी सबैमा सकारात्मक ऊर्जा, आपसी बन्धुत्व र उज्यालो भविष्य निर्माण गर्ने नयाँ प्रेरणा प्रदान गरोस् भनी हार्दिक शुभकामना व्यक्त गर्दछौं।

शुभकामना प्रेषक:
खडानन्द भट्ट
प्रबन्ध निर्देशक— मिडिया ठाँटी प्रा. लि. / ठाँटी खबर
“मिडिया ठाँटी सुख दु:ख को साथी”