कम्बोडिया र क्यानडा पठाइदिन्छु भन्दै ७० लाख ठग्ने दुई जना पक्राउ

काठमाडौं, वैदेशिक रोजगारीमा आकर्षक तलबको प्रलोभन देखाएर ठगी गर्ने दुई जनालाई प्रहरीले पक्राउ गरेको छ। विदेश पठाइदिने बाहानामा लाखौँ रुपैयाँ उठएर सम्पर्कविहीन बनेका उनीहरूलाई काठमाडौं उपत्यका अपराध अनुसन्धान कार्यालय टेकुबाट खटिएको प्रहरी टोलीले पक्राउ गरेको हो। यससम्बन्धी आधिकारिक जानकारी नेपाल प्रहरी प्रधान कार्यालयले सार्वजनिक गरेको छ।

प्रहरीका अनुसार पक्राउ पर्नेमा दोलखाको मेलुङ गाउँपालिका-६ घर भई हाल काठमाडौं-१५ बस्ने २५ वर्षीय नोर्गेन मोक्तान र काभ्रेको चौंरीदेउराली गाउँपालिका-९ घर भई हाल काठमाडौं-३२ बस्ने २४ वर्षीया सुस्मिता रसाईली रहेका छन्। पीडितहरूको जाहेरीका आधारमा प्रहरीले नोर्गेनलाई ललितपुर महानगरपालिका-३ बाट र सुस्मितालाई काठमाडौं महानगरपालिका-३२ बाट नियन्त्रणमा लिएको हो।

आरोपीहरूले सोझासाझा नागरिकलाई विदेशका राम्रा ठाउँमा पठाइदिने भन्दै मोटो रकम असुलेका थिए। नोर्गेनले कम्बोडिया पठाइदिने प्रलोभन देखाएर २ जना पीडितबाट ४० लाख रुपैयाँ लिएका थिए भने सुस्मिताले क्यानडा पठाइदिन्छु भन्दै ३ जना पीडितबाट ३० लाख रुपैयाँ ठगी गरेका थिए। रकम लिएलगत्तै उनीहरू सम्पर्कविहीन बनेका थिए।

विदेशको सपना देखाएर करोडको हाराहारीमा ठगी गर्ने उनीहरूमाथि थप अनुसन्धान भइरहेको छ। प्रहरीले पक्राउ परेका दुवै जनालाई आवश्यक अनुसन्धान तथा कानुनी कारबाहीका लागि वैदेशిక रोजगार विभाग, ताहाचल, काठमाडौं पठाइसकेको छ। प्रहरीले वैदेशिक रोजगारीमा जानुभन्दा अगाडि राम्रोसँग बुझ्न र आधिकारिक संस्था वा व्यक्तिसँग मात्र कारोबार गर्न सबैलाई अनुरोध गरेको छ।