त्रिपुरेश्वरमा शरीरमा आगो लगाएका गणेश नेपालीको उपचारकै क्रममा निधन

काठमाडौं, असार २६। काठमाडौंको त्रिपुरेश्वरस्थित राहदानी विभाग अगाडि आफ्नै शरीरमा आगो लगाएर गम्भीर घाइते भएका मुगुका २५ वर्षीय गणेश नेपालीको उपचारका क्रममा निधन भएको छ।

काठमाडौं प्रहरीका अनुसार वीर अस्पतालमा भेन्टिलेटरमा उपचाररत नेपालीको शुक्रबार बिहान ११:२० बजे मृत्यु भएको हो।

प्रहरीले दिएको जानकारीअनुसार उनको अवस्था अत्यन्त गम्भीर रहेकाले भारतमा थप उपचारका लागि लैजाने तयारी गरिएको थियो। तर स्वास्थ्य अवस्था अस्थिर बनेपछि चिकित्सकको सल्लाहमा उक्त योजना स्थगित गरिएको थियो।

वीर अस्पतालका चिकित्सकका अनुसार नेपालीको अनुहार, टाउको, घाँटी र छातीसहित शरीरको करिब ६० प्रतिशत भाग जलेको थियो। प्रारम्भिक शल्यक्रिया गरिए पनि स्वास्थ्य अवस्थामा अपेक्षित सुधार आउन नसकेको अस्पताल स्रोतले जनाएको थियो।

मुगुको सोरु गाउँपालिका–१ निवासी गणेश नेपालीले बिहीबार राहदानी विभाग अगाडि पेट्रोल छर्केर आफ्नै शरीरमा आगो लगाएका थिए। घटनापछि उनलाई तत्काल उद्धार गरी वीर अस्पतालमा भर्ना गरिएको थियो।

घटनाको कारण र अन्य पक्षबारे सम्बन्धित निकायले थप अनुसन्धान गरिरहेको जनाएको छ।