बर्दिया र डोल्पामा जुवातास खेल्दै गरेका १२ जना पक्राउ

काठमाडौं, जेठ — बर्दिया र डोल्पाका दुई छुट्टाछुट्टै स्थानबाट जुवातास तथा कौडा खेलिरहेको अवस्थामा १२ जनालाई प्रहरीले पक्राउ गरेको छ।

बर्दियाको ठाकुरबाबा नगरपालिका–२ रानीपुरस्थित एक घरमा जुवातास खेलिरहेको सूचनाका आधारमा पुगेको प्रहरी टोलीले घरधनी ३८ वर्षीय बिनोद तिवारीसहित ६ जनालाई पक्राउ गरेको हो। उनीहरूको साथबाट नगद २४ हजार १ सय ३५ रुपैयाँ र ३ बुक तास बरामद गरिएको प्रहरीले जनाएको छ।

त्यसैगरी डोल्पाको ठूलीभेरी नगरपालिका–३ दुनै बजारस्थित एक घरमा कौडा खेलिरहेको अवस्थामा घरधनी ५१ वर्षीय पञ्च बुढासहित ६ जनालाई प्रहरीले नियन्त्रणमा लिएको छ। घटनास्थलबाट नगद ४९ हजार ८ सय रुपैयाँ र ४६ थान कौडा बरामद गरिएको छ।

प्रहरीले दुवै घटनामा संलग्न व्यक्तिहरूमाथि आवश्यक अनुसन्धान अघि बढाएको जनाएको छ। अवैध जुवा तथा सट्टाबाजी नियन्त्रणका लागि निगरानी र कारबाहीलाई निरन्तरता दिइने प्रहरीको भनाइ छ।