सुनसरीको जंगलबाट ४३० किलो गाँजा बरामद, मोटरसाइकलसमेत फेला !

सुनसरी, २७ जेठ — सुनसरीमा ठूलो परिमाणमा लागूऔषध गाँजा बरामद भएको छ। प्रहरीले बराहक्षेत्र नगरपालिका–२ स्थित पटनाली जंगल क्षेत्रबाट करिब ४ सय ३० किलोग्राम गाँजा बरामद गरेको जनाएको छ।

इलाका प्रहरी कार्यालय चतराबाट खटिएको टोलीले मंगलबार बेलुकी जंगलमा शंकास्पद अवस्थामा राखिएका १५ वटा बोराभित्र रहेको गाँजाफेला पारेको हो।

घटनास्थलबाट को.२४ प ६७४ नम्बरको मोटरसाइकल समेत बरामद भएको प्रहरीले जनाएको छ। बरामद गाँजा कसले ल्यायो, कहाँ लैजान लागिएको थियो र यसमा संलग्न व्यक्ति वा समूह को हुन् भन्ने विषयमा अनुसन्धान तीव्र बनाइएको छ।

यो बरामदगीलाई पछिल्लो समय पूर्वी नेपालमा लागूऔषध नियन्त्रण अभियानको महत्वपूर्ण सफलता मानिएको छ। प्रहरीले लागूऔषध ओसारपसारमा संलग्न व्यक्तिहरूको खोजी जारी राखेको जनाएको छ।