काठमाडौं र चितवनमा जुवा खेलिरहेका २१ जना पक्राउ, ३ लाखभन्दा बढी नगद बरामद

काठमाडौं, काठमाडौं र चितवनका छुट्टाछुट्टै स्थानमा जुवातास खेलिरहेको अवस्थामा प्रहरीले २१ जनालाई पक्राउ गरेको छ। उनीहरूको साथबाट ३ लाख रुपैयाँभन्दा बढी नगद र ताससमेत बरामद गरिएको प्रहरीले जनाएको छ।

काठमाडौं महानगरपालिका–१३ सोल्टीमोडस्थित सिन्धुपाल्चोक घर भएका ३७ वर्षीय दिनेश लामाको डेरामा जुवातास खेलिरहेको अवस्थामा दिनेशसहित १० जनालाई शनिबार साँझ जिल्ला प्रहरी परिसर काठमाडौंको टोलीले पक्राउ गरेको हो। उनीहरूको साथबाट नगद २ लाख २३ हजार ५ रुपैयाँ र २२ बुक तास बरामद गरिएको प्रहरीले जनाएको छ।

यस्तै, चितवनको भरतपुर महानगरपालिका–३ पुलचोकस्थित ५६ वर्षीय बाबुराम खरेलको घरमा जुवातास खेलिरहेको अवस्थामा बाबुरामसहित ११ जनालाई वडा प्रहरी कार्यालय नारायणगढको टोलीले शनिबार दिउँसो पक्राउ गरेको छ। उनीहरूको साथबाट नगद ८० हजार ४ सय ६५ रुपैयाँ र ४ बुक तास बरामद गरिएको छ।

दुवै घटनाबारे प्रहरीले थप अनुसन्धान गरिरहेको जनाएको छ।