देशभर लागूऔषधविरुद्ध प्रहरीको ठूलो अपरेसन : एकै दिन ४१ जना पक्राउ, हेरोइनदेखि हजारौं ट्रामाडोलसम्म बरामद

काठमाडौं, नेपाल प्रहरीले देशका विभिन्न जिल्लामा सञ्चालन गरेको लागूऔषध नियन्त्रण अभियानअन्तर्गत एकै दिन ४१ जनालाई पक्राउ गरेको छ। अभियानका क्रममा खैरो हेरोइन, ब्राउन सुगर, गाँजा, ट्रामाडोल, कोलिभान, फेनारगन, डाइजेपाम, नोर्फिन लगायत ठूलो परिमाणमा लागूऔषध र नगद बरामद गरिएको प्रहरीले जनाएको छ।

काठमाडौं उपत्यकामा मात्रै लागूऔषध नियन्त्रण ब्यूरो, प्रहरी वृत्त तथा विभिन्न प्रहरी कार्यालयको संयुक्त कारबाहीमा खैरो हेरोइन, ट्रामाडोल र गाँजासहित १५ भन्दा बढी व्यक्ति पक्राउ परेका छन्। ढल्कु, बालकुमारी, फर्पिङ, बौद्ध, शंखमूल, गोकर्ण, ललितपुरलगायत क्षेत्रबाट विभिन्न परिमाणमा लागूऔषध बरामद गरिएको छ।

यस्तै, सुनसरी, झापा, मोरङ, रूपन्देही, कास्की, बाँके र कैलाली लगायत जिल्लामा पनि विशेष अपरेसन सञ्चालन गरी ब्राउन सुगर, खैरो हेरोइन, ट्रामाडोल, कोलिभान, डाइक्लोमाइन तथा इन्जेक्सनजन्य लागूऔषधसहित थप व्यक्तिहरू पक्राउ परेका छन्। केही स्थानबाट लाखौँ रुपैयाँ नगद समेत बरामद भएको प्रहरीले जनाएको छ।

प्रहरीका अनुसार यस अभियानमा सयौं ग्राम हेरोइन र ब्राउन सुगर, हजारौं ट्रामाडोल तथा अन्य नियन्त्रित औषधिका ट्याब्लेट, साथै लागूऔषध कारोबारबाट प्राप्त भएको आशंका गरिएको नगद रकम बरामद गरिएको छ।

प्रहरीले पक्राउ परेका सबैमाथि लागूऔषध सम्बन्धी कसुरमा थप अनुसन्धान अघि बढाएको जनाएको छ। साथै फरार रहेका अन्य संलग्न व्यक्तिहरूको खोजी कार्य पनि तीव्र रूपमा जारी रहेको प्रहरीले जानकारी दिएको छ।