त्रिभुवन विमानस्थलबाट ठूलो परिमाणको नेपाली तथा विदेशी मुद्रासहित दुई बंगलादेशी नागरिक पक्राउ

काठमाडौं, जेठ — त्रिभुवन अन्तर्राष्ट्रिय विमानस्थलबाट बाह्य मुलुकतर्फ लैजान लागेको स्रोत नखुलेको नेपाली तथा विदेशी मुद्रासहित दुई बंगलादेशी नागरिकलाई प्रहरीले पक्राउ गरेको छ।

पक्राउ पर्नेमा ३९ वर्षीय मोहम्मद इन्ताज अली (Mohammad Intaz Ali) र ५० वर्षीय एमडी जाकिर होसैन (MD Zakir Hossain) रहेका छन्।

त्रिभुवन अन्तर्राष्ट्रिय विमानस्थलको अन्तर्राष्ट्रिय उडानतर्फको प्रस्थान ह्याण्ड ब्यागेज चेकिङ क्षेत्रमा नियमित जाँचका क्रममा उनीहरूलाई पक्राउ गरिएको हो। प्रहरीका अनुसार बाटिक एयरमार्फत काठमाडौंबाट मलेसिया जान लागेका उनीहरूको साथबाट ठूलो परिमाणमा स्रोत नखुलेको रकम बरामद गरिएको छ।

मोहम्मद इन्ताज अलीको साथबाट नेपाली १० लाख २५ हजार रुपैयाँ तथा जाकिर होसैनको साथबाट नेपाली १२ लाख ३४ हजार रुपैयाँ, अमेरिकी डलर १ हजार र मलेसियन रिङ्गिट २० हजार बरामद भएको प्रहरीले जनाएको छ।

बरामद रकमको स्रोत तथा उद्देश्यबारे अनुसन्धान भइरहेको छ। पक्राउ परेका दुवै जनालाई थप अनुसन्धान तथा आवश्यक कारबाहीका लागि राजस्व अनुसन्धान विभाग, हरिहरभवन पुल्चोक, ललितपुर पठाइएको छ।