बाजुरामा खोलाले बगाउँदा १४ वर्षीय किशोरको मृत्यु

बाजुरा, २९ वैशाख । बाजुराको हिमाली गाउँपालिकामा खोलाले बगाउँदा एक किशोरको मृत्यु भएको छ। हिमाली गाउँपालिका-१ मैतार्नास्थित कुवाडी खोला तर्ने क्रममा सोही ठाउँका १४ वर्षीय किशोरको ज्यान गएको हो।

मृत्यु हुनेमा हिमाली गाउँपालिका-१ नेटा बस्ने चंखलाल थापाका छोरा नवराज थापा रहेका छन्। आइतबार कुवाडी खोला तर्ने क्रममा उनलाई खोलाले बगाएर बेपत्ता बनाएको थियो।

किशोर बेपत्ता भएको खबर प्राप्त हुनासाथ प्रहरी चौकी बिच्छिया र अस्थायी प्रहरी पोष्ट कुवाडीबाट प्रहरी टोली खटिएको थियो। स्थानीयको सहयोगमा खोजी कार्य जारी राखेको प्रहरीले सोमबार दिउँसो उनको शव फेला पारेको हो।

घटनाको सम्बन्धमा प्रहरीले थप कानुनी प्रक्रिया र आवश्यक अनुसन्धान अगाडि बढाएको जानकारी दिएको छ।

सतर्कता सन्देश: वर्षायाम सुरु हुनै लाग्दा पहाडी भेगका खोलानालाहरूमा पानीको बहाव बढ्ने भएकाले खोला तर्दा विशेष सावधानी अपनाउन र बालबालिकालाई एक्लै खोला किनारमा नपठाउन प्रहरीले आग्रह गरेको छ।