धनकुटामा महिलाको सुनको सिक्री लुट्ने डाँका समूह धरानबाट पक्राउ

धनकुटा, २९ वैशाख । धनकुटा नगरपालिका-७ मदन चोकमा एक महिलालाई धम्क्याएर सुनको सिक्री लुट्ने कार्यमा संलग्न रहेको अभियोगमा प्रहरीले तीन जनालाई पक्राउ गरेको छ। जिल्ला प्रहरी कार्यालय धनकुटाबाट खटिएको विशेष टोलीले उनीहरूलाई सुनसरीको धरानबाट नियन्त्रणमा लिएको हो।

पक्राउ पर्ने तीनै जना सिन्धुली जिल्लाका बासिन्दा हुन्: १. दान बहादुर तामाङ (धन बहादुर): ३० वर्षीय, दुधौली नगरपालिका-६ २. प्रेमलाल घिसिङ (सन्तोष): ३३ वर्षीय, दुधौली नगरपालिका-१२ ३. राजु तामाङ: ३८ वर्षीय, दुधौली नगरपालिका-१०

गत शुक्रबार धनकुटा नगरपालिका-७ मदन चोकस्थित एकान्त बाटोमा दुईवटा मोटरसाइकलमा आएका व्यक्तिहरूले एक महिलालाई धाकधम्की दिई उनले लगाएको १ तोला २ आना बराबरको सुनको सिक्री लुटेर फरार भएका थिए। घटनालगत्तै प्रहरीले सूक्ष्म अनुसन्धान र खोजी कार्य तीव्र पारेको थियो।

लुटपाट गरी फरार भएका उनीहरूलाई प्रहरीले धरान उपमहानगरपालिका-८ वरगाछीस्थित एक होटलमा लुकेर बसेको अवस्थामा फेला पारेको थियो। उनीहरूको साथबाट प्रहरीले निम्न सामग्रीहरू बरामद गरेको छ:

• सुन जस्तो देखिने धातुका विभिन्न गरगहना

• मोबाइल ६ थान

• लुटपाटमा प्रयोग भएको प्र.३-०२-०१३ प ८००१ र बा.८२ प ९५६४ नम्बरको मोटरसाइकल

पक्राउ परेका तीनै जनालाई धनकुटा ल्याई डाँका चोरी मुद्दामा आवश्यक अनुसन्धान अगाडि बढाइएको छ। यो समूह अन्य लुटपाटका घटनामा पनि संलग्न भए/नभएको बारे प्रहरीले अनुसन्धान गरिरहेको जानकारी दिएको छ।