कञ्चनपुरमा आगलागी: दुईवटा गोठ जलेर नष्ट, ४ लाखको क्षति

कञ्चनपुर, २९ वैशाख । कञ्चनपुरको बेदकोट नगरपालिकामा भीषण आगलागी हुँदा लाखौँको धनमाल जलेर नष्ट भएको छ। बेदकोट नगरपालिका-१० चथरी बस्ने गणेश सुनार र चक्र सुनारको गोठमा आइतबार दिउँसो अचानक आगलागी भएको हो।

प्रहरीका अनुसार आगलागीबाट गणेश र चक्र सुनारको गोठभित्र रहेका काठपात, पराल तथा अन्य जिन्सी सामानहरू पूर्ण रूपमा नष्ट भएका छन्। प्रारम्भिक विवरण अनुसार दुवै जनाको गरी करिब ४ लाख रूपैयाँ बराबरको धनमाल जलेर नष्ट भएको छ।

आगलागीको जानकारी प्राप्त हुनासाथ घटनास्थल पुगेको प्रहरी टोलीले स्थानीय बासिन्दा र दमकलको सहयोगमा आगो नियन्त्रणमा लिएको थियो। समयमै आगो नियन्त्रणमा लिइएका कारण बस्तीका अन्य घरहरूमा भने थप क्षति हुन पाएन।

आगलागी कसरी भयो भन्नेबारे स्पष्ट हुन सकेको छैन। यसबारे थप बुझ्न स्थानीय प्रहरीले आवश्यक अनुसन्धान गरिरहेको जानकारी दिएको छ।