देशका विभिन्न स्थानबाट अवैध लागूऔषधसहित २४ जना पक्राउ; ८ केजी अफिम र ब्राउनसुगर बरामद

काठमाडौं, ६ वैशाख । नेपाल प्रहरीले देशका विभिन्न स्थानमा चलाएको विशेष अपरेसनका क्रममा अवैध लागूऔषधसहित २४ जनालाई पक्राउ गरेको छ। काठमाडौं, झापा, कञ्चनपुर, जाजरकोट, सिन्धुलीलगायतका जिल्लाबाट ठुलो परिमाणमा अफिम, ब्राउनसुगर, खैरो हेरोइन र नियन्त्रित औषधि ट्रामाडोलसहित उनीहरू पक्राउ परेका हुन्।

उपत्यका र बागमती प्रदेशमा सक्रियता काठमाडौंको टेकुबाट १३० ट्याब्लेट ट्रामाडोलसहित काभ्रेका २५ वर्षीय मिलन लामा पक्राउ परेका छन्। त्यसैगरी, ललितपुरको ठेचोबाट मकवानपुरका विवक तामाङ १०० ट्याब्लेट ट्रामाडोलसहित पक्राउ परेका छन्। नुवाकोटको लिखु गाउँपालिकास्थित एक होटलबाट ३ ग्राम ६८० मिलिग्राम ब्राउनसुगरसहित रसुवा र नुवाकोटका ५ जनालाई प्रहरीले नियन्त्रणमा लिएको छ। यस्तै, सिन्धुलीको भिमानमा विराटनगरबाट काठमाडौं आउँदै गरेको हाईस चेकजाँच गर्दा २५ ग्राम ३८० मिलिग्राम खैरो हेरोइनसहित भारतीय नागरिक शंकर जैसवाल पक्राउ परेका छन्।

जाजरकोटमा ८ केजी बढी अफिम बरामद सबैभन्दा ठुलो परिमाणमा लागूऔषध जाजरकोटमा बरामद भएको छ। छेडागाड नगरपालिका–५ थलबजारबाट करिब ८ किलो २२५ ग्राम अफिमसहित बाँकेका ३७ वर्षीय दिपक कुमालसहित दुई जना पक्राउ परेका छन्। इलाका प्रहरी कार्यालय बडावनबाट खटिएको टोलीले उनीहरूलाई उक्त अवैध पदार्थसहित फेला पारेको हो।

तराई र सुदूरपश्चिममा पनि पक्राउको लहर झापाको भद्रपुरबाट ३ ग्राम २० मिलिग्राम ब्राउनसुगरसहित हरि प्रसाद राजबंशी पक्राउ परेका छन् भने मोरङको रतुवामाईबाट अमिल लिम्बु खैरो हेरोइनसहित समातिएका छन्। सिराहाको कल्याणपुरमा अन्जय राय ९ सय मिलिग्राम ब्राउनसुगर र १७ हजार नगदसहित पक्राउ परेका छन्। यस्तै, बर्दियाको बढैयातालबाट पवन श्रेष्ठ र प्रविन कुमार थारू ब्राउनसुगरसहित पक्राउ परेका छन्।

कञ्चनपुरका विभिन्न स्थानबाट मात्रै ७ जना पक्राउ परेका छन्। पुनर्वास र बेलौरी नगरपालिकाका विभिन्न ठाउँबाट खैरो हेरोइन र ट्रामाडोलसहित रोहन तामाङ, बिरेन्द्र राना, बिजय गिरी, अमन तामाङ, रोहन विक, अनिल राना र सुनिल चौधरी पक्राउ परेका हुन्। यस्तै, कैलालीको गोदावरी बसपार्कबाट डोटीका कृष्ण दमाई पनि खैरो हेरोइनसहित पक्राउ परेका छन्।

पक्राउ परेका सबै व्यक्तिहरूमाथि सम्बन्धित जिल्लाका प्रहरी कार्यालयहरूले थप अनुसन्धान प्रक्रिया अगाडि बढाएको प्रहरीले जनाएको छ।