भारतबाट ल्याउँदै गरेको ८ लाख नगदसहित दुई जना पक्राउ

सर्लाही, २८ चैत — स्रोत नखुलेको ठूलो परिमाणको नगदसहित दुई जनालाई प्रहरीले पक्राउ गरेको छ। ब्रहम्पुरी गाउँपालिका–४ क्षेत्रबाट शुक्रबार राति उनीहरूलाई नियन्त्रणमा लिइएको हो।

पक्राउ पर्नेहरूमा चन्द्रनगर गाउँपालिका–४ का २३ वर्षीय कृष्ण कुमार पासवान र चन्द्रनगर गाउँपालिका–१ का ४१ वर्षीय शिव नारायण महतोरहेका छन्। उनीहरू भारतबाट नेपालतर्फ आउँदै गरेको अवस्थामा शंकास्पद गतिविधिका आधारमा प्रहरीले जाँच गरेको थियो।

जिल्ला प्रहरी कार्यालय सर्लाहीबाट खटिएको टोलीले म.प्र.०३-०३७ प ७४५० नम्बरको मोटरसाइकलमा सवार उनीहरूलाई रोकेर जाँच गर्दा ८ लाख रुपैयाँ नगद फेला परेको प्रहरीले जनाएको छ।

प्रारम्भिक अनुसन्धानअनुसार उक्त रकमको स्पष्ट स्रोत खुल्न नसकेको र अवैध कारोबारसँग सम्बन्धित हुन सक्ने आशंका गरिएको छ।

यस घटनाबारे प्रहरीले थप अनुसन्धान अघि बढाएको छ भने आर्थिक अपराधसँग जोडिएको हुन सक्ने कोणबाट पनि छानबिन भइरहेको जनाएको छ।