२४ घण्टाभित्रै छुट्टाछुट्टै दुर्घटनामा ५ को ज्यान गयो

काठमाडौं, २६ चैत | पछिल्लो २४ घण्टामा देशका विभिन्न स्थानमा भएका सवारी दुर्घटनामा परी ५ जनाको मृत्यु भएको छ।

कालिकोटमा एम्बुलेन्स दुर्घटना: खाँडाचक्र नगरपालिका-२ मेयर खोलामा एम्बुलेन्स अनियन्त्रित भई दुर्घटना हुँदा चालक शक्ति बहादुर शाही र यात्री भिम बहादुर अधिकारीको मृत्यु भएको छ। घाइतेहरूको सुर्खेतमा उपचार भइरहेको छ।

कपिलवस्तुमा बालकको मृत्यु: कपिलवस्तु नगरपालिका-६ मा मोटरसाइकलको ठक्करबाट ७ वर्षीय सुरेश कसौधनको ज्यान गएको छ। चालकलाई प्रहरीले नियन्त्रणमा लिएको छ।

रूपन्देही र कैलालीमा स्कुटर दुर्घटना: बुटवलमा ट्याक्टर र स्कुटर ठक्कर खाँदा ३८ वर्षीया सुमित्रा बरालको मृत्यु भएको छ। यस्तै कैलालीको गोदावरीमा स्कुटर अनियन्त्रित भई पल्टिँदा ४५ वर्षीय ओम प्रकाश मल्लको उपचारका क्रममा निधन भएको छ।

प्रहरीले सबै घटनाको सम्बन्धमा थप अनुसन्धान गरिरहेको जनाएको छ।