कांग्रेस विशेष महाधिवेशन : सभापतिमा गगन थापाको मात्रै उम्मेदवारी

३० पुस, काठमाडौं।

नेपाली कांग्रेसको दोस्रो विशेष महाधिवेशनमा अप्रत्याशित मोड आएको छ। पार्टी सभापतिका लागि महामन्त्री गगन थापाको मात्रै उम्मेदवारी दर्ता भएपछि भृकुटीमण्डपको राजनीतिक तापक्रम एकाएक बढेको छ।

आइतबारदेखि जारी विशेष महाधिवेशनमा थापाले सभापतिका लागि औपचारिक उम्मेदवारी दर्ता गराएका हुन्। निर्वाचन समिति स्रोतका अनुसार सभापतिमा थापाबाहेक कसैको पनि मनोनयन परेको छैन, जसले कांग्रेसभित्र नयाँ सत्ता समीकरणको संकेत गरेको छ।

बुधबार बिहान वर्तमान सभापति शेरबहादुर देउवा, महामन्त्री गगन थापा र विश्वप्रकाश शर्माबीच सहमतिको अन्तिम प्रयासस्वरूप वार्ता भएको थियो। तर वार्ता निष्कर्षविहीन भएपछि थापा मैदानमा एक्लै उत्रिएका हुन्।

यद्यपि सभापतिसहित अन्य सबै पदाधिकारीका लागि मनोनयन दर्ता भइसकेको निर्वाचन समितिले जनाएको छ। दुई महामन्त्री थापा र शर्मा भने अहिले कानुनविद्हरूसँग गहन परामर्शमा रहेको स्रोतको भनाइ छ।

निर्वाचन समिति संयोजक सीताराम केसीका अनुसार उम्मेदवारी दर्ताको समय सकिएको छ र आज दिउँसो १ बजे उम्मेदवारको नामावली सार्वजनिक गरिनेछ।

अब प्रश्न एउटै छ— गगन थापाको एकल उम्मेदवारी कांग्रेसको ‘गेम चेन्जर’ बन्ने हो?