क्षेत्रपाटीको खाजा घरमा जुवाको खाल, ३८ हजार नगदसहित ९ जना पक्राउ

काठमाडौं, १३ भदौ । काठमाडौंको क्षेत्रपाटीस्थित एक खाजा घरमा जुवातास खेलिरहेको अवस्थामा प्रहरीले ९ जनालाई पक्राउ गरेको छ।

काठमाडौं महानगरपालिका–१७, क्षेत्रपाटी चोकस्थित खाजा घरमा गएराति जुवातास खेलिरहेको सूचना पाएपछि प्रहरी वृत्त लैनचौरबाट खटिएको टोलीले उनीहरूलाई नियन्त्रणमा लिएको हो।

पक्राउ पर्नेमा क्षेत्रपाटी बस्ने तथा काभ्रेपलाञ्चोकको नमोबुद्ध नगरपालिका–९ घर भएका २२ वर्षीय कृष्ण तामाङसहित ९ जना रहेको प्रहरीले जनाएको छ।

प्रहरीका अनुसार उनीहरूको साथबाट जुवामा प्रयोग भइरहेको नगद ३८ हजार रुपैयाँ समेत बरामद गरिएको छ।

घटनाबारे प्रहरीले आवश्यक अनुसन्धान अघि बढाएको जनाएको छ।