जुवातास खेलिरहेको अवस्थामा २६ जना पक्राउ, ९ लाखभन्दा बढी नगद बरामद

काठमाडौं, प्रहरीले कपिलवस्तु र भक्तपुरबाट जुवातास खेलिरहेको अवस्थामा २६ जनालाई पक्राउ गरेको छ। उनीहरूको साथबाट प्रहरीले ९ लाख २९ हजार रुपैयाँभन्दा बढी नगद तथा २८ बुक तास बरामद गरेको जनाएको छ।

कपिलवस्तुमा १५ जना पक्राउ
कृष्णनगर नगरपालिका–३ निवासी ३२ वर्षीय बिनोद हेलाको घरमा शनिबार साँझ जुवातास खेलिरहेको अवस्थामा बिनोदसहित १५ जनालाई प्रहरीले पक्राउ गरेको हो। लुम्बिनी प्रदेश प्रहरी कार्यालय र इलाका प्रहरी कार्यालय कृष्णनगरबाट खटिएको टोलीले उनीहरूलाई ४ लाख ७५ हजार रुपैयाँ नगद र ३ बुक ताससहित पक्राउ गरेको जनाएको छ।

भक्तपुरमा ११ जना पक्राउ
त्यस्तै, भक्तपुरको मध्यपुर थिमी नगरपालिका–८, बोडे डायमण्ड चोकस्थित सिन्धुपाल्चोक घर भएका ४६ वर्षीय ढकल बहादुर तामाङको डेरा कोठामा जुवातास खेलिरहेको अवस्थामा ढकल बहादुरसहित ११ जनालाई पक्राउ गरिएको छ। प्रहरी वृत्त ठिमीबाट खटिएको टोलीले उनीहरूको साथबाट ४ लाख ५४ हजार रुपैयाँ नगद र २५ बुक तास बरामद गरेको जनाएको छ।

यसरी दुवै घटनामा गरी २६ जना पक्राउ, ९ लाख २९ हजार रुपैयाँ नगद र २८ बुक तास बरामद भएको प्रहरीले जनाएको छ। घटनाबारे आवश्यक अनुसन्धान भइरहेको छ।