नक्कली श्रम स्वीकृति बनाएर २ लाख ५५ हजार ठगी, एक जना पक्राउ

काठमाडौं । कतार पठाइदिन्छु भन्दै नक्कली श्रम स्वीकृति अनुमति पत्र बनाएर पीडितसँग २ लाख ५५ हजार रुपैयाँ ठगी गरेको आरोपमा प्रहरीले एक जनालाई पक्राउ गरेको छ।

पक्राउ पर्नेमा काठमाडौं महानगरपालिका–९ बस्ने कपिलवस्तु नगरपालिका–२ का ३७ वर्षीय फजले रसुल रहेका छन्।

प्रहरीका अनुसार उनले वैदेशिक रोजगार विभाग, ताहाचलबाट जारी हुने श्रम स्वीकृतिको नक्कली अनुमति पत्र तयार गरी पीडितलाई कतार पठाइदिने भन्दै रकम लिएका थिए।

काठमाडौं उपत्यका अपराध अनुसन्धान कार्यालय, टेकुबाट खटिएको प्रहरीले उनलाई सिनामंगलबाट पक्राउ गरेको हो।

पक्राउ परेका रसुललाई आवश्यक अनुसन्धान तथा कारबाहीका लागि जिल्ला प्रहरी परिसर, काठमाडौं पठाइएको प्रहरीले जनाएको छ।

वैदेशिक रोजगारीमा जानुअघि श्रम स्वीकृति र कागजातको आधिकारिकता अनिवार्य जाँच गर्नुहोस्।