पर्यटक र यात्रुलाई दुःख दिने आठ जना पोखराबाट पक्राउ

कास्की, पर्यटक तथा यात्रुहरूलाई सस्तोमा होटल मिलाइदिने प्रलोभन देखाएर दुःख हैरानी दिएको आरोपमा आठ जनालाई प्रहरीले पक्राउ गरेको छ।

जिल्ला प्रहरी कार्यालय कास्कीका अनुसार पोखरा महानगरपालिका–६ लेकसाइड र वडा नं. १७ बिरौटा क्षेत्रमा आन्तरिक तथा बाह्य पर्यटकलाई आकर्षक तथा सस्तो दरमा होटल मिलाइदिने भन्दै अनावश्यक रूपमा हैरानी दिइरहेको भन्ने सूचनाका आधारमा प्रहरी टोली परिचालन गरिएको थियो।

प्रहरीले सो क्रममा पोखरा–१७ बिरौटाबाट पाँच जना र पोखरा–६ हल्लनचोकबाट तीन जना गरी आठ जनालाई पक्राउ गरेको जनाएको छ।

घटनाबारे थप अनुसन्धान भइरहेको प्रहरीले जनाएको छ। पर्यटकलाई लक्षित गरी हुने यस्ता गतिविधि नियन्त्रण गर्न प्रहरीले निगरानी र कारबाहीलाई निरन्तरता दिने जनाएको छ।