लुम्बिनीमा शान्ति र जनचेतनाको सशक्त सन्देश : प्रहरी महानिरीक्षक कार्कीको नेतृत्वमा शान्ति पदयात्रा सम्पन्न

रूपन्देही,  शान्ति, सहिष्णुता र सामाजिक सद्भावको सन्देश फैलाउने उद्देश्यसहित लुम्बिनीमा भव्य शान्ति पदयात्रा तथा जनचेतनामूलक कार्यक्रम सम्पन्न भएको छ।

कार्यक्रमको प्रमुख आतिथ्यतामा प्रहरी महानिरीक्षक दान बहादुर कार्की सहभागी रहनुभएको थियो। लुम्बिनी साँस्कृतिक नगरपालिका–१० स्थित लुम्बिनी विकास कोष परिसर, विश्व शान्ति दीप अगाडि सुरु भएको पदयात्रा लिटल बुद्धदेखि अन्तर्राष्ट्रिय सभाहलसम्म सम्पन्न भएको हो।

कार्यक्रममा नेपाल प्रहरी श्रीमती संघकी अध्यक्ष नविना कार्की, सुरक्षा निकायका उच्च अधिकारी, स्थानीय जनप्रतिनिधि, विभिन्न संघसंस्था, सञ्चारकर्मी, विद्यार्थी तथा नागरिक समाजको उल्लेखनीय सहभागिता रहेको थियो।

सामूहिक प्रतिबद्धताको सन्देश

कार्यक्रमलाई सम्बोधन गर्दै प्रहरी महानिरीक्षक कार्कीले भने,
“सुरक्षा, शान्ति र विकास केवल प्रहरीको प्रयासले मात्र सम्भव छैन, सबै सरोकारवालाको सामूहिक प्रतिबद्धता आवश्यक छ।”

उनले लागूऔषध दुर्व्यसन, आत्महत्या, सडक दुर्घटना लगायतका चुनौतीहरू नियन्त्रण गर्न समाज–प्रहरी–स्थानीय तहबीचको सहकार्य अपरिहार्य रहेको उल्लेख गरे।

जनचेतना अभियानलाई नयाँ आयाम

कार्यक्रम अन्तर्गत लागूऔषध दुर्व्यसन, आत्महत्या न्यूनीकरण, सडक दुर्घटना रोकथाम, एसिड आक्रमण, बालविवाह तथा साइबर अपराधबारे नाटक, प्रस्तुति र अनुभव आदान–प्रदान गरिएको थियो।

विशेष आकर्षणका रूपमा नेपाल प्रहरी केन्द्रीय संगीत विद्यालयको ब्याण्ड डिस्प्ले र पुनःस्थापित लागूऔषध पीडितहरूको प्रेरणादायी अनुभव प्रस्तुत गरिएको थियो।

प्रविधि र शान्तिको संयोजन

लुम्बिनी प्रदेश प्रहरी कार्यालयद्वारा सञ्चालन गरिएको तीन दिने अभियान अन्तर्गत Hack4Safety, Peace Walk र Community Awareness Program मार्फत युवालाई प्रविधिमार्फत सुरक्षा, साइबर अपराध नियन्त्रण र सामाजिक सचेतनामा जोड्ने प्रयास गरिएको छ।

शान्तिको सन्देश लुम्बिनीबाट विश्वभर

लुम्बिनीको पवित्र भूमिबाट प्रवाह गरिएको सन्देश स्पष्ट छ —
“शान्ति केवल प्रहरीको होइन, सम्पूर्ण समाजको साझा जिम्मेवारी हो।”

शान्ति, सुरक्षा र सचेत समाज निर्माणतर्फ लुम्बिनीको ऐतिहासिक कदमलाई सबैले सकारात्मक रूपमा लिएका छन्।

(Photo/News Source : Nepal Police)