काभ्रे बस दुर्घटना र धनुषा सडक दुर्घटनामा ९ जनाको ज्यान गयो

काठमाडौं, जेठ — देशका दुई छुट्टाछुट्टै सवारी दुर्घटनामा ९ जनाको मृत्यु भएको छ भने १६ जना घाइते भएका छन्।

काभ्रेपलाञ्चोकको नमोबुद्ध नगरपालिका–२ बुच्चाकोटस्थित सडकमा बनेपाबाट रोशी खार्पाचोकतर्फ जाँदै गरेको बा.३ ख ८३९८ नम्बरको बस अनियन्त्रित भई करिब ३०० मिटर तल खस्दा बसमा सवार ८ जनाको घटनास्थलमै मृत्यु भएको प्रहरीले जनाएको छ।

दुर्घटनामा घाइते भएका १६ जनालाई उपचारका लागि धुलिखेल अस्पताल पठाइएको छ। दुर्घटनाको कारणबारे थप अनुसन्धान भइरहेको छ।

त्यसैगरी धनुषाको जनकपुरधाम उपमहानगरपालिका–१४ स्थित सडकमा जेसिबी र मोटरसाइकल एकआपसमा ठोक्किँदा मोटरसाइकल चालक महोत्तरीका ६५ वर्षीय विपिन कुमार झाको मृत्यु भएको छ। दुर्घटनामा गम्भीर घाइते भएका उनको जनकपुरस्थित साई ट्रमा अस्पतालमा उपचारका क्रममा निधन भएको हो।

प्रहरीले फरार रहेका जेसिबी चालकको खोजी गरिरहेको जनाएको छ। दुवै दुर्घटनाका सम्बन्धमा थप अनुसन्धान जारी रहेको छ।