सहकारी ठगी प्रकरणमा इन्द्रेणी सहकारीका अध्यक्ष पक्राउ !

कास्की, २७ जेठ — सहकारी ठगी प्रकरणमा फरार रहेका इन्द्रेणी बचत तथा ऋण सहकारी संस्थाका अध्यक्ष जितेन्द्र थापा पक्राउ परेका छन्।

बाँकेको नेपालगञ्ज उपमहानगरपालिका–१ निवासी ४३ वर्षीय थापालाई जिल्ला प्रहरी कार्यालय कास्कीको टोलीले पोखरा महानगरपालिका–८ सृजनाचोकबाट मंगलबार पक्राउ गरेको हो।

प्रहरीका अनुसार उनीविरुद्ध ठगी सम्बन्धी कसुरमा जिल्ला अदालत बाँकेबाट पक्राउ पुर्जी जारी भएको थियो। अदालतको आदेशपछि खोजी अभियान चलाइरहेको प्रहरीले उनलाई पोखराबाट नियन्त्रणमा लिन सफल भएको जनाएको छ।

पक्राउ परेका थापालाई थप अनुसन्धान तथा कानुनी कारबाहीका लागि जिल्ला प्रहरी कार्यालय बाँके पठाइएको छ।

हाल देशभर सहकारी ठगीका घटनामाथि निगरानी र कारबाही तीव्र बनाइएका बेला यो पक्राउलाई महत्वपूर्ण उपलब्धिका रूपमा हेरिएको छ।