स्लोभाकिया पठाइदिन्छु भन्दै लाखौँ ठगी गर्ने पाल्पाका हिमहरी अर्याल पक्राउ

काठमाडौँ, १८ वैशाख । आकर्षक तलबको लोभ देखाएर वैदेशिक रोजगारीका लागि स्लोभाकिया पठाइदिने बहानामा युवाहरूलाई ठगी गर्ने एक व्यक्तिलाई प्रहरीले नियन्त्रणमा लिएको छ ।

पक्राउ पर्नेमा पाल्पा रैनादेवी छहरा गाउँपालिका–६ घर भएका ४५ वर्षीय हिमहरी अर्याल रहेका छन् । उनलाई काठमाडौँ उपत्यका अपराध अनुसन्धान कार्यालय टेकुको टोलीले बुधबार काठमाडौँको सुन्धारा (वडा नं ११) क्षेत्रबाट पक्राउ गरेको हो ।

अर्यालले ५ जना पीडितहरूलाई स्लोभाकियामा राम्रो कमाइ हुने प्रलोभन देखाएर प्रतिव्यक्ति मोटो रकम असुलेका थिए । प्रहरीका अनुसार उनले पीडितहरूबाट कुल ३ लाख ७५ हजार रुपैयाँ नगद बुझेर लामो समयदेखि सम्पर्कविहीन भएका थिए । आफू ठगिएको महसुस गरेपछि पीडितहरूले प्रहरीमा उजुरी दिएका थिए ।

पक्राउ परेका अर्याललाई थप अनुसन्धान र कारबाहीका लागि वैदेशिक रोजगार विभाग, ताहाचल पठाइएको छ । प्रहरीले वैदेशिक रोजगारीमा जाँदा आधिकारिक माध्यमबाट मात्र प्रक्रिया अगाडि बढाउन र व्यक्तिगत लेनदेनमा सचेत रहन सर्वसाधारणलाई आग्रह गरेको छ ।