डोटीमा सेती नदीले बगाएर बैतडीका एक युवकको मृत्यु

डोटी, डोटीको सेती नदीमा नुहाउने क्रममा बगाएर एक युवकको मृत्यु भएको छ। मृत्यु हुनेमा बैतडी घर भई हाल डोटीको दिपायल सिलगढी नगरपालिका–५, घोलतडास्थित क्रसर कम्पनीमा कार्यरत २२ वर्षीय दिपक बोहरा रहेका छन्।

नुहाउने क्रममा भएको थियो दुर्घटना

प्रहरीका अनुसार बोहरा शुक्रबार बिहान सेती नदीमा नुहाउन गएका थिए। नुहाउने क्रममा नदीको तीव्र बहावले उनलाई बगाएर बेपत्ता पारेको थियो। घटनाबारे जानकारी प्राप्त हुनासाथ इलाका प्रहरी कार्यालय दिपायलको टोलीले खोजी कार्य सुरु गरेको थियो।

शव फेला र अनुसन्धान

खोजी गर्ने क्रममा उनको शव बगाएको स्थानभन्दा केही तल के.आई. सिंह गाउँपालिका–५ स्थित सेती नदीको किनारमा फेला परेको हो। प्रहरीले शवलाई पोस्टमार्टमका लागि अस्पताल पठाएको छ भने घटनाका सम्बन्धमा थप अनुसन्धान भइरहेको जानकारी दिएको छ।