न्यूरोडमा लुटपाट र एटीएम तोडफोडमा संलग्न युवक सामाखुशीबाट पक्राउ

काठमाडौँ, काठमाडौँको न्यूरोडमा लुटपाट र गोङ्गबुमा एटीएम मेसिन तोडफोड गरेको अभियोगमा एक युवक पक्राउ परेका छन्। पक्राउ पर्नेमा सिन्धुलीको हरिहरपुरगढी गाउँपालिका–८ घर भई हाल असन बस्ने २१ वर्षीय सविन नेपाली रहेका छन्।

घटनाको विवरण

प्रहरीका अनुसार नेपालीले बुधबार राति काठमाडौँ महानगरपालिका–१९, न्यूरोड रामघाटस्थित गल्लीमा एक व्यक्तिलाई कुटपिट गरी नगद तथा जिन्सी सामान लुटपाट गरेका थिए। लुटपाटमा संलग्न उनले भोलिपल्ट बिहीबार बिहान गोङ्गबु चोकस्थित ग्लोबल आईएमई बैंकको एटीएम मेसिन समेत तोडफोड गरेको अनुसन्धानबाट खुलेको छ।

यसरी भए पक्राउ

लुटपाट र एटीएम तोडफोडको घटनापछि काठमाडौँ उपत्यका अपराध अनुसन्धान कार्यालयबाट खटिएको विशेष टोलीले खोजी कार्य तीव्र पारेको थियो। सोही क्रममा उनलाई बिहीबार सामाखुशी क्षेत्रबाट नियन्त्रणमा लिइएको हो।

पक्राउ परेका नेपालीलाई थप अनुसन्धान तथा कानुनी कारबाहीका लागि जिल्ला प्रहरी परिसर, काठमाडौँ पठाइएको प्रहरीले जनाएको छ।