मनोहरामा सुकुम्वासी व्यवस्थापन: आफैँ फिल्डमा उत्रिए प्रहरी महानिरीक्षक कार्की

काठमाडौँ । काठमाडौँको मनोहरा नदी किनारमा रहेको अतिक्रमित संरचना र सुकुम्वासी व्यवस्थापन कार्यलाई थप व्यवस्थित बनाउन नेपाल प्रहरीका महानिरीक्षक (IGP) दान बहादुर कार्की आफैँ कार्यक्षेत्रमा पुग्नुभएको छ ।

शनिबार थापाथली र गैरीगाउँको सफल व्यवस्थापनपछि मनोहरा क्षेत्रमा पुगेको प्रहरी टोलीमाथि स्थानीयबाट केही अवरोध र ढुङ्गामुढा भएको थियो । सो क्रममा केही सुरक्षाकर्मी घाइते भएपछि स्थिति केही समय तनावपूर्ण बनेको थियो । तर, संयमता अपनाउँदै प्रहरीले आइतबार बिहानैदेखि पुनः संवाद र समन्वयको माध्यमबाट व्यवस्थापन कार्य सुरु गरेको छ ।

सुरक्षाकर्मीको मनोबल बढाउन र संवादका लागि महानिरीक्षकको उपस्थिति

आइतबार बिहान मनोहरा क्षेत्र पुग्नुभएका महानिरीक्षक कार्कीले फिल्डमै खटिएका सुरक्षाकर्मीहरूसँग भेट गरी उनीहरूको मनोबल उच्च बनाउनु भयो । उहाँले सुरक्षाकर्मीहरूलाई निर्देशन दिँदै भन्नुभयो, “मानवीय संवेदनशीलतालाई पहिलो प्राथमिकतामा राख्नुहोस् र स्थानीयसँगको सम्बन्ध सौहार्दपूर्ण बनाएर मात्र कार्य अगाडि बढाउनुहोस् ।”

स्थानीयसँग प्रत्यक्ष संवाद: सहकार्यको आह्वान

महानिरीक्षक कार्कीले केवल सुरक्षा घेराको निरीक्षण मात्र गर्नुभएन, उहाँले स्थानीय बासिन्दासँग प्रत्यक्ष संवाद गरी समस्याको समाधान शान्तिपूर्ण तरिकाले खोज्न आग्रह समेत गर्नुभयो । उहाँले विकास र व्यवस्थापनका कार्यमा प्रहरीलाई सहयोग गर्न र कुनै पनि अप्रिय घटना हुन नदिन स्थानीयलाई सहकार्यका लागि आह्वान गर्नुभयो ।

प्रहरी नेतृत्व नै स्वयं कार्यक्षेत्रमा उपस्थित भएपछि सुरक्षा व्यवस्थापन थप सुदृढ देखिएको छ भने स्थानीय र प्रहरीबीचको संवादले वातावरणलाई सकारात्मक दिशातिर मोडेको पाइएको छ । अहिले उक्त क्षेत्रमा अतिक्रमण हटाउने र व्यवस्थापन गर्ने कार्य व्यवस्थित र समन्वयात्मक ढङ्गले अगाडि बढिरहेको छ ।

(फोटो/समाचार स्रोत: नेपाल प्रहरी प्रधान कार्यालय, प्रहरी महानिरीक्षकको सचिवालय)