टिकटकमार्फत २ लाख ठगी गर्ने युवक पक्राउ

काठमाडौं, ११ वैशाख।काठमाडौंमा अनलाइन ठगीका घटनाहरू बढ्दै गइरहेका बेला प्रहरीले ठगीमा संलग्न एक युवकलाई पक्राउ गरेको छ। इलाम फाकफोकथुम गाउँपालिका–६ घर भएका २७ वर्षीय सुजन लिम्बु (सुशन थेगिम लिम्बु) लाई मंगलबार काठमाडौं उपत्यका अपराध अनुसन्धान कार्यालय, टेकुको टोलीले नियन्त्रणमा लिएको हो।

प्रहरीका अनुसार आरोपीले सामाजिक सञ्जाल टिकटकमार्फत पीडितसँग नजिकिँदै विश्वास जित्ने रणनीति अपनाएका थिए। उनले विभिन्न प्रलोभन देखाउँदै अमेरिकाबाट डलर, गरगहना लगायत महँगा उपहार पठाएको भन्दै पीडितलाई झुक्याएका थिए।

अनुसन्धानका क्रममा उनले “डिएचएलमार्फत पठाएको सामान काठमाडौं एयरपोर्टमा आइपुगेको छ” भन्ने झुटो जानकारी दिँदै सो सामान बुझ्न कस्टम शुल्क र कर तिर्नुपर्ने बहाना बनाएर विभिन्न बैंक खातामा रकम जम्मा गर्न लगाएको खुलासा भएको छ। यसरी उनले पीडितबाट करिब २ लाख रुपैयाँ ठगी गरेको प्रहरीले जनाएको छ।