जापान र अजरवैजान पठाइदिने भन्दै ३३ लाख ठगी: काठमाडौंबाट दुई ‘योजनाकार’ पक्राउ !

काठमाडौं, २३ चैत । वैदेशिक रोजगारीको आकर्षक प्रलोभन देखाएर सर्वसाधारणबाट लाखौँ रुपैयाँ ठगी गर्ने दुई जनालाई प्रहरीले काठमाडौंका विभिन्न स्थानबाट पक्राउ गरेको छ। ‘राम्रो तलब र सुविधा’ को सपना बाँडेर युवाहरूलाई ठग्ने गिरोहका मुख्य व्यक्तिहरू आइतबार काठमाडौं उपत्यका अपराध अनुसन्धान कार्यालयको टोलीद्वारा समातिएका हुन्।

को-को हुन् पक्राउ पर्ने? पक्राउ पर्नेहरूमा बैतडी दोगडाकेदार गाउँपालिका-५ घर भई हाल काठमाडौं महानगर-३१ बस्ने ३४ वर्षीय विरेन्द्र बहादुर चन्द र नवलपरासी पश्चिम रामग्राम नगरपालिका-१३ का ३८ वर्षीय महाविर नाउ रहेका छन्।

• जापानको सपना देखाएर १५ लाख गायब: विरेन्द्र बहादुर चन्दले एक पीडितलाई आकर्षक रोजगारीका लागि जापान पठाइदिने प्रलोभनमा पारी १५ लाख रुपैयाँ असुलेका थिए। रकम हात पारेपछि उनी सम्पर्कविहीन बनेका थिए।

• अजरवैजानको नाममा १८ लाख ठगी: महाविर नाउले दुई जना पीडितहरूलाई अजरवैजान पठाउने भन्दै पटक-पटक गरी १८ लाख रुपैयाँ ठगी गरेको उजुरी प्रहरीमा परेको थियो।

पीडितहरूले दिएको उजुरीका आधारमा काठमाडौं उपत्यका अपराध अनुसन्धान कार्यालय टेकुबाट खटिएको विशेष टोलीले सर्च अपरेशन चलाएको थियो। सोही क्रममा चन्दलाई काठमाडौं-१० र नाउलाई काठमाडौं-१२ बाट नियन्त्रणमा लिइएको हो।

पक्राउ परेका दुवै जनालाई थप अनुसन्धान तथा कडा कारवाहीका लागि वैदेशिक रोजगार विभाग, ताहाचल पठाइएको छ।

प्रहरीले वैदेशिक रोजगारीमा जानुअघि सम्बन्धित म्यानपावर र व्यक्तिको आधिकारिकता जाँच गर्न सर्वसाधारणलाई अपिल गरेको छ।