काभ्रे र रूपन्देहीबाट जुवातास खेलिरहेको अवस्थामा ११ जना पक्राउ

काठमाडौँ, देशका विभिन्न स्थानमा जुवातास नियन्त्रणका लागि सक्रियता बढाएको प्रहरीले काभ्रे र रूपन्देहीबाट तास खेलिरहेको अवस्थामा ११ जनालाई नगद र तासबुकसहित रंगेहात पक्राउ गरेको छ।

काभ्रेको पनौती नगरपालिका-५ ढलमलेस्थित मेघराज कार्कीको चिया पसलमा जुवातास खेलिरहेको अवस्थामा सञ्चालक मेघराजसहित ४ जनालाई प्रहरीले शनिबार दिउँसो पक्राउ गरेको हो। प्रहरी चौकी पनौतीबाट खटिएको टोलीले उनीहरूलाई नगद १९ हजार ३ सय ७५ रूपैयाँ र ३ बुक तासबुकसहित नियन्त्रणमा लिएको छ।

त्यसैगरी रूपन्देहीको तिलोत्तमा नगरपालिका-४ डिङ्गानगर सिद्धार्थ पथबाट जुवातास खेलिरहेको अवस्थामा तिलोत्तमा-६ बस्ने ३८ वर्षीय तिलक वलीसहित ७ जना पक्राउ परेका छन्। अस्थायी प्रहरी पोष्ट ड्राइभरटोलबाट खटिएको प्रहरी टोलीले उनीहरूको साथबाट नगद ४३ हजार ४ सय १० रूपैयाँ र ३ बुक तास बरामद गरेको छ।

पक्राउ परेका सबैजनामाथि कानुनी प्रक्रिया अगाडि बढाइएको र घटनाबारे आवश्यक अनुसन्धान भइरहेको जानकारी नेपाल प्रहरी प्रधान कार्यालयले गराएको छ।