धरानमा कुटपिटपछि वृद्धको मृत्यु, एक पक्राउ

सुनसरी, २८ फागुन || धरान उपमहानगरपालिका–५ देउरालीका ७२ वर्षीय सुरेन श्रेष्ठको हत्या गरेको अभियोगमा प्रहरीले धरान–१५ का ३२ वर्षीय भरत बिकलाई बुधबार राति पक्राउ गरेको छ।

प्रहरीका अनुसार धरान–१५ मा भएको वादविवादका क्रममा भरतले कुटपिट गर्दा सुरेन गम्भीर घाइते भएका थिए। उनलाई उपचारका लागि विपी कोइराला स्वास्थ्य विज्ञान प्रतिष्ठान, घोपा लगिएको थियो। उपचारकै क्रममा उनको मृत्यु भएको हो।

घटनाको जानकारी पाएपछि अस्थायी प्रहरी चौकी बसपार्कबाट खटिएको प्रहरी टोलीले भरतलाई नियन्त्रणमा लिएको जनाएको छ।

घटनाबारे थप अनुसन्धान भइरहेको प्रहरीले जनाएको छ।