अवैध लागूऔषधसहित ३ जना पक्राउ

काठमाडौं, २६ फागुन — देशका विभिन्न स्थानबाट अवैध लागूऔषधसहित तीन जना पक्राउ परेका छन्।

बारा जिल्लाको निजगढ नगरपालिका–११ रतनपुरबाट प्रहरीले १२ किलो २ सय ३० ग्राम गाँजासहित दुई जनालाई मंगलबार बिहान पक्राउ गरेको छ। पक्राउ पर्नेहरूमा जीतपुर सिमरा उपमहानगरपालिका–१९ ईनर्वा सिरहा बस्ने ३५ वर्षीय फिरोज देवान र रौतहटको गौर नगरपालिका–९ बस्ने १९ वर्षीय तरबेज आलम रहेका छन्।

अस्थायी प्रहरी पोष्ट रतनपुरबाट खटिएको टोलीले ग.६ प ८८५१ नम्बरको मोटरसाइकलमा सवार फिरोजको साथबाट ६ किलो ४ सय ५० ग्राम र मधेश प्रदेश ०३–०३८ प १२०९ नम्बरको मोटरसाइकलमा सवार तरबेजको साथबाट ५ किलो ७ सय ८० ग्राम गाँजा बरामद गरेको प्रहरीले जनाएको छ।

यसैबीच, चितवनको भरतपुर महानगरपालिका–१८ लाहुरेचोकबाट नियन्त्रित लागूऔषध ट्रामाडोल २२० ट्याब्लेट सहित भरतपुर–२३ जगतपुर बस्ने २९ वर्षीय सोम पाण्डेलाई पनि मंगलबार दिउँसो प्रहरीले पक्राउ गरेको छ।

इलाका प्रहरी कार्यालय चनौलीबाट खटिएको टोलीले उनलाई उक्त लागूऔषधसहित नियन्त्रणमा लिएको हो।

यस घटनाबारे थप अनुसन्धान भइरहेको प्रहरीले जनाएको छ।