खुकुरी देखाई कुटपिट गरेको भिडियो पोस्ट गर्ने व्यक्ति पक्राउ

दाङ, सामाजिक सञ्जालमा खुकुरी देखाई डर–धम्की दिँदै कुटपिट गरेको भिडियो पोस्ट गरेको अभियोगमा एक युवक पक्राउ परेका छन्।

पक्राउ पर्नेमा दाङको तुलसीपुर उपमहानगरपालिका–२ भंके बस्ने २४ वर्षीय रमेश ठाडा मगर रहेका छन्। उनलाई इलाका प्रहरी कार्यालय तुलसीपुर बाट खटिएको टोलीले नियन्त्रणमा लिएको हो।

के हो घटना ?

प्रहरीका अनुसार रमेशले एक युवतीलाई जंगलमा लगेर खुकुरी देखाई धम्की दिँदै कुटपिट गरेको भिडियो सामाजिक सञ्जालमा सार्वजनिक गरेका थिए। उक्त भिडियो भाइरल भएपछि प्रहरीले तत्काल अनुसन्धान अघि बढाएको थियो।

लागूऔषध पनि बरामद

प्रहरीले उनको घरमा गरेको तलासीका क्रममा विभिन्न प्रकारका नियन्त्रित औषधिहरू (Pregamax, Trohmo, Antikop, Nitrazohm)समेत फेला पारेको जनाएको छ।

साथै घटनासँग सम्बन्धित थप एक जनालाई पनि अनुसन्धानका लागि नियन्त्रणमा लिइएको छ।

अनुसन्धान जारी

प्रहरीले घटनाबारे थप अनुसन्धान भइरहेको जनाएको छ।

सामाजिक सञ्जालमा हिंसा, धम्की वा अपराधजन्य सामग्री पोस्ट गर्नु कानुनी अपराध हो — प्रहरीको चेतावनी।