पोखरामा जुवाको खालबाट ९ जना पक्राउ; ३ लाख १९ हजारभन्दा बढी नगद बरामद

पोखरा, ६ वैशाख । कास्कीको पोखरा महानगरपालिकामा जुवातास खेलिरहेको अवस्थामा प्रहरीले ९ जनालाई नियन्त्रणमा लिएको छ। पोखरा महानगरपालिका–२६ बरालडाँडास्थित ४० वर्षीया उषा रानाको डेरा कोठामा जुवा खेलिरहेको सूचनाका आधारमा उनीहरूलाई पक्राउ गरिएको हो।

जिल्ला प्रहरी कार्यालय कास्कीबाट खटिएको प्रहरी टोलीले शनिबार दिउँसो छापा मार्दा घरबेटी उषा रानासहित ९ जनालाई जुवाको खालबाटै समातेको हो।

प्रहरीले जुवाको खालबाट नगद ३ लाख १९ हजार ४ सय ३७ रूपैयाँ र ४ बुक ताससमेत बरामद गरेको छ। पक्राउ परेका व्यक्तिहरूमाथि जुवा ऐनअन्तर्गत थप अनुसन्धान भइरहेको कास्की प्रहरीले जनाएको छ।