नेपाल–भारत उद्योग वाणिज्य संघ (NICCI) तथा हाउस अफ राजकर्णिकारद्वारा काठमाडौंमा नेपाल–भारत खाद्य तथा पेय पदार्थ फोरम २०२६ आयोजना

काठमाडौं, असार २९। नेपाल–भारत उद्योग वाणिज्य संघ (NICCI) र हाउस अफ राजकर्णिकारको संयुक्त आयोजनामा काठमाडौंमा नेपाल–भारत खाद्य तथा पेय पदार्थ फोरम २०२६ सम्पन्न भएको छ। फोरमले नेपाल र भारतबीच खाद्य, पेय पदार्थ तथा आतिथ्य (हस्पिटालिटी) क्षेत्रको व्यापार, लगानी र व्यावसायिक सहकार्यलाई थप सुदृढ बनाउने उद्देश्यका साथ दुवै देशका उद्योगी, व्यवसायी तथा सरोकारवालालाई एउटै मञ्चमा ल्याएको हो।

कार्यक्रम आगामी ११–१३ सेप्टेम्बर २०२६ मा भारतको वाराणसीस्थित गिरिजा देवी संस्कृत सङ्कुलमा आयोजना हुने नेपाल–भारत खाद्य तथा पेय पदार्थ प्रदर्शनी २०२६ को पूर्वतयारीका रूपमा सम्पन्न भएको हो। फोरममा भारतीय बजारमा नेपाली उत्पादनको पहुँच विस्तार, निर्यात प्रवर्द्धन तथा अन्तर्राष्ट्रिय व्यापारका सम्भावनाबारे विस्तृत छलफल गरिएको थियो।

नेपाल–भारत उद्योग वाणिज्य संघ (NICCI) का उपाध्यक्ष कुनाल कायलले खाद्य, पेय पदार्थ तथा आतिथ्य क्षेत्रमार्फत नेपाल–भारत आर्थिक सम्बन्धलाई अझ सुदृढ बनाउन यस्ता फोरम प्रभावकारी हुने बताउनुभयो। उहाँले उद्योग–केन्द्रित संवादले व्यावसायिक सञ्जाल विस्तार, नयाँ बजार पहुँच र सीमापार साझेदारी विकासमा महत्वपूर्ण योगदान पुग्ने विश्वास व्यक्त गर्नुभयो।

हाउस अफ राजकर्णिकारका अध्यक्ष वीरेन्द्र राजकर्णिकारले संस्थाले व्यापार तथा उद्योग प्रवर्द्धनका लागि सञ्चालन गरिरहेका पहलहरूको जानकारी गराउँदै नेपाल–भारतबीचको आर्थिक सहकार्यलाई थप उचाइमा पुर्‍याउन निजी क्षेत्रको सक्रिय भूमिका आवश्यक रहेको उल्लेख गर्नुभयो। त्यसैगरी, विशेषज्ञ राजन शर्माले वाराणसीमा हुने प्रदर्शनीका अवसर, सम्भावित लाभ तथा सहभागी व्यवसायीहरूले ध्यान दिनुपर्ने विषयहरूबारे प्रस्तुति दिनुभएको थियो।

फोरममा होटल, रेस्टुरेन्ट तथा क्याटरिङ (HoReCa) क्षेत्रका प्रतिनिधि, खाद्य तथा पेय पदार्थ उत्पादक, आतिथ्य व्यवसायी, उद्यमी, निर्यातकर्ता, वितरक तथा विभिन्न उद्योग क्षेत्रका सरोकारवालाको उल्लेखनीय सहभागिता रहेको थियो। सहभागीहरूले द्विपक्षीय व्यापार विस्तार, बजार पहुँच अभिवृद्धि तथा दीर्घकालीन व्यावसायिक साझेदारीलाई अझ प्रभावकारी बनाउने विषयमा विचार आदानप्रदान गरेका थिए।

नेपाल–भारत उद्योग वाणिज्य संघ (NICCI) ले यस्ता पहलमार्फत नेपाल र भारतका व्यवसायीबीच अर्थपूर्ण संवादलाई निरन्तर प्रोत्साहन गर्दै व्यापार, लगानी तथा आर्थिक सहकार्यलाई थप सुदृढ बनाउने प्रतिबद्धता दोहोराएको छ।