आधा उमेरको उत्तराधिकारी: ७३ वर्षकी सुशीला कार्कीले ३६ वर्षका बालेनलाई सुम्पिन् देशको चाबी।

काठमाडौं, १३ चैत २०८२ — नेपालको राजनीतिमा दशकौँदेखिको ‘सिन्डिकेट’ तोड्दै युवा नेता बालेन्द्र शाह (बालेन) मुलुकको ४३ औँ प्रधानमन्त्री नियुक्त भएका छन्। राष्ट्रिय स्वतन्त्र पार्टी (रास्वपा) मा प्रवेश गरेको अढाइ महिनामै देशको बागडोर सम्हाल्न सफल बालेनले शपथ ग्रहणसँगै इतिहासका अनेकौँ पुराना रेकर्डहरू ध्वस्त पारेका छन्।

१. ‘नाति पुस्ता’ को उदय: ७९ वर्षका देउवा रोकिँदा ३६ वर्षका बालेन अघि

बहुदलीय व्यवस्था स्थापना भएपछि जन्मिएको व्यक्ति प्रधानमन्त्री बनेको यो नेपालको इतिहासमै पहिलो पटक हो। अहिलेसम्म राणाकालमा जन्मिएका नेताहरूले पालैपालो शासन गरिरहेको अवस्थामा बालेनको इन्ट्रीले ‘जेनजी’ (Gen-Z) पुस्ताको वास्तविक प्रतिनिधित्व गरेको छ। ७९ वर्षीय शेरबहादुर देउवा प्रधानमन्त्री बन्ने लाइनमा रहँदा बालेनले उनलाई विस्थापित गरिदिएका हुन्।

२. ५० हजारको मतान्तर: ओलीसँगको एतिहासिक बदला

बालेनले झापा क्षेत्र नम्बर ५ बाट पूर्वप्रधानमन्त्री केपी शर्मा ओलीलाई झण्डै ५० हजार मतान्तरले पराजित गरेर विश्वकै ध्यान तानेका थिए। संसदीय निर्वाचनको इतिहासमा बालेनले प्राप्त गरेको ६८ हजार ३४८ मत अहिलेसम्मकै सर्वाधिक मत हो। “२०-२५ वर्ष नेतृत्व छाड्दिनँ” भन्ने ओलीलाई उनकै गढमा हराउनु बालेनको करिअरको सबैभन्दा ठूलो ‘टर्निङ प्वाइन्ट’ बन्यो।

३. पहिलो मधेशी प्रधानमन्त्री

नेपालको लोकतान्त्रिक इतिहासमा मधेशी समुदायका व्यक्ति प्रधानमन्त्री बनेको यो पहिलो अवसर हो। समावेशिताको सवालमा बालेनको यो विजयले नयाँ राष्ट्रिय एकताको सन्देश दिएको छ। उनले पहिलो महिला प्रधानमन्त्री सुशीला कार्कीबाट सत्ताको नेतृत्व लिँदै समावेशी इतिहासलाई निरन्तरता दिएका छन्।

४. अढाइ महिनामै सिंहदरबारको यात्रा

कुनै पनि राजनीतिक दलमा प्रवेश गरेको यति छोटो अवधिमा प्रधानमन्त्री बन्नु लगभग असम्भव मानिन्छ। तर ४ माघमा काठमाडौंको मेयरबाट राजीनामा दिएर रास्वपा प्रवेश गरेका बालेन ७० दिनभित्रै देशको कार्यकारी प्रमुख बन्न सफल भए। यो विश्व राजनीतिमै दुर्लभ घटना मानिएको छ।

५. युवामय मन्त्रिपरिषद्: ४० मुनिका ७ मन्त्री

बालेनले आफ्नो मन्त्रिपरिषद्लाई पनि ‘विज्ञ र युवा’ को मिश्रण बनाएका छन्। १५ सदस्यीय मन्त्रिमण्डलमा ७ जना मन्त्रीहरू ४० वर्ष मुनिका छन्। ३९ वर्षीय सुधन गुरुङलाई गृहमन्त्री बनाउनु र अर्थतन्त्र बुझेका डा. स्वर्णिम वाग्लेलाई अर्थमन्त्रालय सुम्पिनुले बालेनले ‘काम गर्ने टोली’ रोजेको प्रष्ट हुन्छ।

“टाइम म्यागाजिनको प्रभावशाली १०० व्यक्तिको सूचीबाट सुरु भएको बालेनको अन्तर्राष्ट्रिय पहिचान अब नेपालको प्रधानमन्त्रीका रूपमा थप मजबुत बनेको छ। सामाजिक सञ्जालमा करोडौँको इन्गेजमेन्ट राख्ने बालेनको अबको चुनौती सडकको लोकप्रियतालाई सिंहदरबारको डेलिभरीमा बदल्नु हुनेछ।”