नेपाली जनता दलले फागुन २१ गते हुने निर्वाचनमा खेल्नु पर्ने भूमिक — हरिचरण साहको अपिल

आदरणीय नेपाली दिदीबहिनी तथा दाजुभाइहरू,

फागुन २१ गते हुने निर्वाचन केवल प्रतिनिधि छान्ने औपचारिक प्रक्रिया मात्र होइन, यो देशको राजनीतिक दिशानिर्देश पुनःनिर्धारण गर्ने ऐतिहासिक अवसर हो। आज नेपाली जनता गहिरो निराशा, बढ्दो असमानता र निरन्तर अस्थिरताबाट गुज्रिरहेका छन्। यस्तो संवेदनशील घडीमा नेपाली जनता दलले जिम्मेवार, इमानदार र दूरदर्शी राजनीतिक भूमिकामा उभिनु अपरिहार्य भएको छ।

नेपाली जनता दलले अघि सारेको समावेशी मानव–केन्द्रित लोकतान्त्रिक समाजवाद सत्ता प्राप्तिको नारा होइन, राज्य र नागरिकबीचको सम्बन्धलाई नयाँ ढंगले परिभाषित गर्ने स्पष्ट दृष्टिकोण हो। हामी राजनीति शक्तिको प्रदर्शनका लागि होइन, नागरिकको सम्मानित जीवन सुनिश्चित गर्न प्रयोग हुनुपर्छ भन्ने विश्वास राख्छौँ। राज्य नागरिकको सेवक बन्नुपर्छ, शासक होइन।

आजको यथार्थ के छ भने दशकौँदेखि शासनमा रहेका दलहरूले सुशासनलाई भाषणमा सीमित बनाए, तर व्यवहारमा भ्रष्टाचार, कुशासन र स्वार्थको राजनीति संस्थागत गरे। यही कारण आज जनतामा बढ्दो वितृष्णा, युवामा आक्रोश र समाजमा गहिरिँदो अविश्वास देखिएको छ। यो अवस्था आकस्मिक होइन, गलत राजनीतिक अभ्यासको परिणाम हो।

नेपाली जनता दल त्यसैको विकल्पका रूपमा उभिएको छ। हामी झूटा सपना देखाएर होइन, यथार्थलाई स्वीकार गर्दै समाधानको बाटो देखाउने राजनीतिमा विश्वास गर्छौँ। हाम्रो प्राथमिकता समावेशी विकास, सामाजिक न्याय, उत्पादनमुखी अर्थतन्त्र, स्वदेशी स्रोतको संरक्षण तथा शिक्षा–स्वास्थ्य–सामाजिक सुरक्षालाई नागरिक अधिकारका रूपमा सुनिश्चित गर्नु हो।

हामी स्पष्ट रूपमा भन्न चाहन्छौँ—राजनीति जनसेवा हो, व्यापार होइन। चुनाव खर्चिलो, भडकिलो र प्रदर्शनमुखी बनाउने प्रवृत्ति लोकतन्त्रका लागि खतरनाक छ। भ्रष्टाचार र लेनदेनको राजनीतिविरुद्ध नेपाली जनता दलको अडान स्पष्ट र अडिग छ।

आदरणीय मतदाताहरू,
आज लोकप्रियताको लहर, भावनात्मक नाराबाजी र क्षणिक आकर्षणले राजनीति छोप्दै गएको छ। तर राज्य सञ्चालन आवेगले होइन, नीति, सिद्धान्त, अनुभव र उत्तरदायित्वले हुनुपर्छ। विवेकपूर्ण छनोट आजको सबैभन्दा ठूलो आवश्यकता हो।

फागुन २१ गतेको निर्वाचनमा नेपाली जनता दललाई दिएको तपाईंको मत केवल एक दलको जित होइन, इमानदार राजनीति, संस्थागत लोकतन्त्र र सम्मानित नागरिक जीवनतर्फको सामूहिक कदम हुनेछ। हामी सत्ता होइन, जिम्मेवारी खोजिरहेका छौँ। हामी थाकेका छैनौँ, न त थाक्ने छुट नै हामीलाई छ।

देशको भविष्य सुरक्षित गर्न, लोकतन्त्रलाई बलियो बनाउन र नागरिकको विश्वास पुनःस्थापित गर्न
नेपाली जनता दललाई साथ दिनुहोस्।

धन्यवाद।

हरिचरण साह, अध्यक्ष, नेपाली जनता दल