खाजा पसलमै जुवाको अखडा ! नगदसहित ५ जना रंगेहात पक्राउ

ललितपुर — गोदावरी नगरपालिका–१२ ठेचोस्थित एक खाजा पसलमा खुलेआम जुवातास चलिरहेको अवस्थामा प्रहरीले ५ जनालाई पक्राउ गरेको छ।

प्रहरीका अनुसार ४० वर्षीय सुरेश महर्जनले संचालन गरेको खाजा पसलमा जुवातास खेल भइरहेको विशेष सूचनाका आधारमा प्रहरी वृत्त चापागाउँको टोली पुगेको थियो। छापा मार्ने क्रममा सुरेशसहित ५ जना जुवाखालबाटै पक्राउ परेका हुन्।

प्रहरीले घटनास्थलबाट नगद १ लाख ४७ हजार ३ सय ८५ रुपैयाँ र ६ बुक तास बरामद गरेको जनाएको छ।

स्थानीय बासिन्दाले “खाजा पसलको नाममा जुवाको अड्डा सञ्चालन भइरहेको” गुनासो गरेपछि प्रहरीले निगरानी बढाएको बताइएको छ। पक्राउ परेकामाथि थप अनुसन्धान भइरहेको प्रहरीले जनाएको छ।

उपत्यकामा पछिल्लो समय होटल, खाजा पसल र रेस्टुरेन्टको आवरणमा जुवातास सञ्चालन हुने घटना बढ्दै गएको भन्दै प्रहरीले निगरानी कडा बनाएको छ।