दार्चुलामा जिप दुर्घटना, दुई जनाको मृत्यु

दार्चुला, १७ चैत। शैल्यशिखर नगरपालिका–४ ओशिलस्थित सडकमा मंगलबार बिहान भएको जिप दुर्घटनामा दुई जनाको ज्यान गएको छ। काँडापारीबाट गोकुलेश्वरतर्फ आउँदै गरेको सु.प.प्र.०१–००१ ज १६४१ नम्बरको जिप अनियन्त्रित भई दुर्घटना भएको हो।

दुर्घटनामा जिपमा सवार शैल्यशिखर नगरपालिका–१ बलाँच बस्ने ४५ वर्षीय भरत तितारा र मालिकार्जुन गाउँपालिका–७ बस्ने ३५ वर्षीया मनिसा पाल गम्भीर घाइते भएका थिए। उनीहरूको गोकुलेश्वर अस्पतालमा उपचारको क्रममा मृत्यु भएको प्रहरीले जनाएको छ।

यसैगरी, दुर्घटनामा जिप चालकसहित अन्य ३ जना घाइते भएका छन्। घाइतेहरूलाई थप उपचारका लागि धनगढीस्थित माया मेट्रो अस्पताल, कैलाली पठाइएको छ।

दुर्घटनाका सम्बन्धमा प्रहरीले आवश्यक अनुसन्धान गरिरहेको जनाएको छ।