नारायणी नदीमा बाढी: नवलपुरका तटीय बस्ती डुबानमा, ११४ जनाको सकुशल उद्धार

नवलपुर — अविरल वर्षाका कारण नारायणी नदीमा पानीको सतह उच्च भई बस्तीमा पसेपछि नवलपुरका तटीय क्षेत्रहरू प्रभावित बनेका छन्। बाढीका कारण गैँडाकोट र कावासोतीका तटीय बस्ती जलमग्न भएका छन्।

जिल्ला प्रहरी कार्यालय नवलपुरका अनुसार गैँडाकोट नगरपालिका–२ स्थित बोटे बस्तीका १८ परिवारका ११४ जनालाई बाढीको जोखिमबाट सुरक्षित स्थानमा सारिएको छ। नेपाल प्रहरी, नेपाली सेना र स्थानीयको संयुक्त प्रयासमा उनीहरूलाई आफन्त तथा सुरक्षित आश्रयस्थलमा लगिएको हो। बाढीबाट हालसम्म कुनै मानवीय क्षति भने भएको छैन।

यसैगरी कावासोती नगरपालिका–१७ अमलटारी क्षेत्रसमेत नदीको कटान र डुबानको जोखिममा परेको छ। सो क्षेत्रका बासिन्दाले पशुपन्छी सुरक्षित ठाउँमा पुर्‍याएका छन् भने खाद्यान्न र घरका सामान माथिल्लो तला तथा छतमा राखेर सतर्कता अपनाएका छन्।

देवघाट जलमापन केन्द्रका अनुसार नारायणी नदीको बहाव खतराको तह नजिक पुगेको छ। पानीको सतह ८.९४ मिटर पुगेको छ, जहाँ ९ मिटरलाई पूर्ण खतराको सूचक मानिन्छ। वर्षा निरन्तर भइरहेकाले तटीय क्षेत्रका नागरिकलाई उच्च सतर्कता अपनाउन प्रशासनले आग्रह गरेको छ।