बर्दियामा करेन्ट लागेर ट्रकका सहचालकको मृत्यु

बर्दिया, बर्दियामा करेन्ट लागेर एक ट्रकका सहचालकको मृत्यु भएको छ।

बाँसगढी नगरपालिका–९ का ३० वर्षीय पुरन थारूको करेन्ट लागेर बिहीबार राति मृत्यु भएको प्रहरीले जनाएको छ।

गुलरिया नगरपालिका–१२ भैसाहीस्थित सडकमा लु.१ ख ५७४७ नम्बरको ट्रकमा अड्किएको केवलको तार हटाउने क्रममा उनलाई विद्युत्को तारबाट करेन्ट लागेको थियो। गम्भीर घाइते भएका थारूको जिल्ला अस्पताल गुलरियामा उपचारका क्रममा मृत्यु भएको हो।

घटनापछि प्रहरीले ट्रक चालकलाई नियन्त्रणमा लिएको छ। घटनाबारे थप अनुसन्धान भइरहेको प्रहरीले जनाएको छ।