ओली र लेखक पक्राउपछि भद्रकाली प्रहरी परिसरमा राखियो

काठमाडौँ । पूर्व प्रधानमन्त्री केपी शर्मा ओली र पूर्व गृहमन्त्री रमेश लेखकलाई पक्राउपछि काठमाडौँस्थित भद्रकालीमा रहेको जिल्ला प्रहरी परिसरमा राखिएको छ। शनिबार बिहान भक्तपुरबाट पक्राउ गरिएका दुवै जनालाई सिधै प्रहरी परिसरमा लगिएको बताइएको छ।

प्रहरीका अनुसार ओलीलाई गुण्डु क्षेत्रबाट र लेखकलाई कटुन्जेबाट नियन्त्रणमा लिइएको हो। दुवै जनालाई हाल प्रहरी हिरासतमा राखेर थप अनुसन्धानको प्रक्रिया अघि बढाइएको छ।

भदौ २३ र २४ मा भएको जेनजी प्रदर्शनबारे अनुसन्धान गर्न गठन गरिएको एक छानबिन आयोगले उच्च तहका जिम्मेवार व्यक्तिमाथि फौजदारी अनुसन्धान गर्न सिफारिस गरेको थियो। सोही सिफारिसका आधारमा उनीहरूलाई कानुनी दायरामा ल्याइएको हो।

नयाँ सरकार गठन भएपछि बसेको मन्त्रिपरिषद् बैठकले उक्त सिफारिस कार्यान्वयन गर्ने निर्णय गरेसँगै सुरक्षा निकाय सक्रिय भएका हुन्। त्यसपछि उच्च तहमा छलफल गरी शनिबार बिहानै दुवै जनालाई पक्राउ गरिएको जनाइएको छ।

हाल उनीहरूलाई जिल्ला प्रहरी परिसर काठमाडौँमा राखिएको छ र आगामी दिनमा थप कानुनी प्रक्रिया अघि बढ्ने प्रहरी स्रोतले जनाएको छ।