एमाले भाग्दैन, सामना गर्छ: महासचिव पोखरेलको दृढ प्रतिबद्धता

दैलेख, कात्तिक ३० — नेकपा (एमाले) का महासचिव शंकर पोखरेलले पार्टी देशको राजनीतिक संकटसँग जुध्न सक्षम रहेको बताएका छन्। दैलेखको पटांगीनी, दुल्लूमा आयोजित जनसभामा उनले भने—
“एमाले संकटबाट भाग्ने पार्टी होइन, देशलाई निकास दिने अभियानमा अघि बढ्ने पार्टी हो।”

पोखरेलले भदौ २३–२४ मा देशका संवैधानिक निकायमा भएको तोडफोडलाई “राज्यलाई कमजोर पार्ने सुनियोजित षड्यन्त्र” भने।
“सिंहदरबार, सर्वोच्च अदालतमा आगो लगाउनु राष्ट्रविरुद्धको गम्भीर अपराध हो। हामी संकटसँग भाग्दैनौं, सामना गर्छौं।”

कार्यक्रममा कर्णाली प्रदेशका मुख्यमन्त्री यामलाल कंडेलले आगामी निर्वाचनमा एमाले बहुमतसहित अगाडि आउनुपर्ने र जनताको पहिलो रोजाइ पार्टी नै रहेको बताए।

दैलेख जिल्ला कमिटी अध्यक्ष सूर्यबहादुर शाहीले जेनजी आन्दोलनपछि विघटित प्रतिनिधि सभाको पुनःस्थापनालाई मात्र मुलुकको मार्गनिर्देशनको उपाय भन्दै, एमाले र जनता एक भएर अघि बढे मात्र देश संकटमुक्त हुने बताए।

पोखरेल र अन्य नेताहरूले पार्टी संगठन सुदृढीकरण र जनतासँग निरन्तर सम्पर्कमा रहन कार्यकर्तालाई आग्रह गरे।

तस्बिर: यामराज बिष्ट